識揀，梗係揀呢啲位

認識南哥超過10年，他不單是肉檔老闆和本地肥牛買手，解牛功夫也是一流，刀法如神，我都自愧不如。

今晚去南哥開設的火鍋店晚膳，甫坐下已見南哥的兒子Brian剛從澳洲放假回來，並在店裏幫手。

「今朝有幾件牛腩好正炆好咗，嚟碟坑腩試吓好唔好？」「一般喺街我就食坑腩，嚟到呢度梗係食你嘅爽腩啦！坑腩係牛肋骨之間嘅肌肉，肌肉紋理交錯但短小，唔難整得好食；但係爽腩係牛嘅腹肌，前後有筋膜，加上如果牛肉唔夠肥好難整得好食！我對你爸爸的牛肉有百分百信心！」

「好！之後整幾碟靚嘅牛頸脊同肉眼邊畀你。」「整多碟我喜歡嘅腩頭得唔得？」「梗係可以啦！」興高采烈的Brian忽然面有難色地按住背脊說：「近來腰骨又痛番……」「咁你有冇聽我話做運動啊？」「有啊！我有跑步㗎……但係腰部運動就懶咗啲……」

我望住枱面肥美嘅牛肉說：「識得食，梗係食呢啲位啦。牛係四腳爬行嘅動物，由於肋脊部的運動較少，肉質細嫩脂肪含量較高吃起來口感較香甜多汁。好似你喺澳洲成日食嘅係Porterhouse，圓形嗰舊Tenderloin同橢圓形嘅Sirloin都好好食。但係人就唔同喇，因為我哋用雙腳行路，要靠脊骨支撐身體。所以牛柳（裏脊Psoas）、西冷同肉眼（腰伸肌Spine Extensor）、腩頭（背闊肌Lat.Dosi）、爽腩（腹斜肌Oblique abdominus）都是組成中央肌肉群組（Core muscle）嘅重要部分，對於脊骨健康好重要。牛肉唔靚最多冇生意，你嘅肌肉唔掂就長手尾喇。」

「哦！原來係咁……」Brian忽然用小學生睇《教育電視》嘅口吻回答。「整件靚嘅崩沙腩你返去炆啦！」突然背後傳出南哥雄壯的聲音。真係識人好過識字！

作者為骨科醫生

 

[信健康] 揀選肉類非難事，醫生貼士要留意！【更多健康資訊：health.hkej.com】