唔做手術得唔得?

佘冠文醫生 | 2020-03-11
椎管狹窄如果病情嚴重,不單影響日常生活;當病情惡化時甚至會導致嚴重嘅機能受損,例如下肢乏力和大小便失禁等。

繼續和Samson媽媽討論處理腰椎椎管狹窄問題的處理……

「嗱,伯母,試吓保守治療先,如果情況冇改善,甚至惡化嘅話,就要考慮做手術喇。」我說。「做手術咁危險,梗係唔好啦,唔做得唔得呀?」她說。「手術本身當然係會有危險,包括麻醉嘅風險、手術併發症同後遺症。」我續道:「一般病人都着眼於手術本身嘅風險,但常常忽略唔做手術,本身都存在一定嘅風險。以椎管狹窄為例,如果病情嚴重,不單影響日常生活;當病情惡化時甚至會導致嚴重嘅機能受損,例如下肢乏力和大小便失禁等,到時先至用手術方法處理,效果可能就大打折扣喇!」

「既然係咁就不如而家就做手術啦!」她配上閃爍的眼神反建議。「伯母,你咁樣講有你嘅道理,但我又唔可以認同。因為手術本身有風險同後遺症,如果不是真的需要,是不能草率決定的。」「以你的情況,你嘅腰椎第四五節之間壓得嚴重,同時亦有椎間滑脫及唔穩定嘅跡象,所以需要做腰椎減壓及椎間融合手術。手術會有效地改善病情,但腰椎的結構必然會受影響,而融合後相鄰關節狀況亦有機會隨着時間而惡化。」「況且,很多腰椎退化的情況都可以先嘗試保守治療,很多病人都有不同程度的改善。如果太早就做手術,就抹殺了保守治療嘅好處了!」

簡單來說,一個手術的決定係需要綜合病情、病者的要求、身體狀況,再平衡手術風險及利益之後,與病人及家人一同協商出來的。「所以呢,我嘅責任係中肯地同你分析病情、解釋治療方案及預期。你嘅責任呢係了解咗我嘅資料後, 好好地配合治療。而Samson呢,就係一陣負責出去畀錢……」

作者為骨科專科醫生

 

[信健康] 捍衛健康非難事,腰椎問題要留意!【更多健康資訊:health.hkej.com

熱門話題