放鬆以治「脷」

68歲女士，有心臟病、胃潰瘍、焦慮症，在不同的專科跟進。今天由丈夫陪同到診。女士：「我條脷痛咗好多年，疫情關係冇去到覆診，請你轉介我返去專科睇。」我：「睇咗咁耐，專科話你條脷係咩事呢？」女士：「冇講過，每次摸吓條脷，睇吓，話冇生癌。」丈夫：「佢條脷朝朝起身都好多牙印。睇過幾個專科、牙科， 照埋個腦，都話冇問題。」我：「除咗脷痛平時仲有啲咩唔舒服㗎？」女士：「口乾、耳鳴、失眠……」
答案很明顯。
我：「我一陣解釋你聽點解會脷痛。想知多少少你嘅背景……你有幾多兄弟姊妹？」女士：「4個，我排最細。」我：「你覺得細個時父母對你點？」
一提到父母，她臉色一沉。她仍常常想起10年前過身的母親，並一直內疚讓母親在家摔了一跤，令其身體每況愈下。女士已退休，和丈夫同住，有兩個兒子，都已成家。她常說擔心兒子們的生活和疫情下的工作情況。她亦負責照顧一位智障的姐姐，常到院舍打點。問及她有什麼興趣放鬆自己，她想了一會，說沒有。
我：「雖然第一次見你，但感覺你一直好在意其他人嘅感受。你對各家庭成員好忠心，但就忽略自己，沒有在意自己的感受。呢啲壓力一直積累，令到神經系統紊亂。神經系統負責嘅功能，例如你身上好多肌肉嘅收縮放鬆，都出現問題，包括你條脷。壓力大嘅人，好多會出現牙關咬緊、條脷放鬆唔到一直頂向牙關，瞓醒都感覺到啲牙咬實晒，所以脷有牙印，有啲磨牙磨到牙都蝕埋，都係來自情緒問題。口乾耳鳴失眠，道理相若。你而家最重要做兩樣嘢，一，同我多啲出去玩，搵啲新嘅興趣畀自己。二，同我學習放鬆嘅技巧，例如靜觀練習，轉頭畀埋資料你，OK？」
兩夫婦靜靜的聽着，有點驚訝，略有所悟。最後沒有轉介，沒有開藥，叮囑他們要仔細聆聽身體的聲音。
作者為家庭醫學專科醫生

[信健康] 壓力太大可致脷痛，醫生資訊要留意！【更多健康資訊：health.hkej.com】