請給自己掌聲

62歲女士，一直有輕微濕疹，但這數月間每天都長出皮疹，身、腿甚至外耳道都痕癢非常。沒有發現特別致敏原。她進來診療室的一剎那，我已感覺她人很繃緊。說話快，反應快，卻彷彿背着一堆重擔。很多人都忽略了情緒對皮膚的影響。
我：「最近有無咩壓力？」女士：「我星期一至日都有壓力。」這是預期答案。「公司星期一至日都有開，做貿易，唔睇住唔得嘅。」我：「係自己生意？」女士：「唔係，打工，但係自己都好享受呢份工作。做得都會繼續做。」
一星期工作7天，都好享受？看來是她需要工作帶給她意義，這意義推動她不斷向前衝。
我：「屋企有咩人？」女士：「同老公住，仔女都去晒外國做嘢，老公成日都叫我唔好做，要唞吓。」我：「你有幾多兄弟姊妹？」女士：「嘩，有十幾個！我排中間。」我：「你覺得細個嘅時候父母對你點樣？」女士：「父母冇乜理我，但係我就要做足120分。對佢哋，對我自己啲仔女都係，要求自己做到足。」我：「做到足，想證明畀邊個睇？」女士突然眼泛淚光，說不下去。
我：「其實你已經贏得身邊所有人嘅掌聲，連你老公見到都覺得心痛，想你休息吓。唯一未得到嘅係自己嘅掌聲。你一直尋求其他人肯定，來堆砌成自己嘅價值，卻忽略發展自己內裏嘅價值。你一直為其他人向前衝，卻無停下來聽聽自己內心嘅聲音。身體都被你推動得太疲累，免疫系統紊亂，身體最大嘅器官皮膚都出聲啦，有冇聽過自己身體嘅聲音？」
女士落下淚來。那些苦，那些冤屈，都隨着眼淚出來。
我要她思考一下前面的路，要她發展自己興趣，要真正為自己生活。
我盼望，這樣醫治她的濕疹，會比藥物有效。
作者為家庭醫學專科醫生

[信健康] 面對濕疹的煩惱，醫生資訊要留意！【更多健康資訊：health.hkej.com】