找自己的樹窿
冼銘全醫生 | 2025-06-11
63歲女士，和丈夫同住，到來跟進焦慮抑鬱問題。她每次覆診後都很努力去改變，情緒亦逐漸改善。
女士：「我報告一下先，最近聽你講，學習多啲表達自己，原來講咗出嚟，內心真係舒暢好多。」
我：「你點樣表達自己？」
女士：「我同一個識咗20幾年嘅朋友，講返一啲最近對佢嘅不滿。雖然最後有少少不歡而散，有啲可惜，但係講咗出嚟真係舒服咗好多，好似心頭大石放低咗一樣。」
我：「有什麼原因，令你以前唔去表達？」
女士：「嗯……我以前一直都係聆聽者，好多朋友搵我傾訴。可能我願意聽啦，亦慣咗聽同埋畀意見，好少講返自己嘅嘢，整整吓就覺得好辛苦。上次你話內心積累太多，就冇空間承載其他嘢，所以入面啲嘢要出咗嚟先，我覺得好有道理，從來冇人教我咁做，試吓講多啲自己感受。以前習慣做一個樹窿，而家自己都要搵一個樹窿。」她父母在其懂事前已離異，其人生路真的不容易。
我：「你呢句好有意思。要先處理好自己，然後先有能力幫助其他人。」
女士：「係，上次我先生陪我過嚟，佢忍唔住喺你面前，話我幾十年一直操縱佢嘅生命，我聽完『叮』一聲，原來喺佢心目中我係咁樣，真係點都諗唔到。我以為一切都係為咗佢好，點知原來對佢係一個壓力……之後大家坦白啲講，又互相改變吓，感覺都好咗，好多謝你。」
要處理好情緒，很多時候要一併處理家庭關係。太在乎自己或太在意其他人，都有問題。要拿捏好自己的內心以及在家庭裏的角色，兼顧表達與體察他人感受，真是一大學問，是一生的學問。
作者為家庭醫學專科醫生
[信健康] 釋放好自身情緒，健康資訊要留意！【更多健康資訊：health.hkej.com】