讓眼淚流

74歲女士，覆診高血壓，順道也看頸痛。

女士：「我條頸痛咗好耐，腰背都好痛，睇極都係咁。」頸背有動作便痛，以前從沒受傷。她獨居，主要做點家務，沒有什麼運動。以她年紀，以為是常見的退化與勞損。

留意到她說話很快，好像不能讓自己停下來。和她檢查頸和背部，甫觸到頸的肌肉便覺得驚訝：真的如木板般堅硬。

我：「肌肉長期繃緊，因為你個人都長期繃緊。乜嘢令到你成日咁急？你好似好難安靜落嚟咁。」

女士：「係呀，成日要逼自己行快啲。做嘢要快手嘛！」其實她退休已有10年。

我：「以前做咩工？」

女士：「以前返兩份工，個老公爛賭，叫啲細路十零歲就好出嚟搵食幫補。3個細路話好想讀書，我話好，咁我做兩份工咯！夜晚返一份政府，放工瞓一陣日頭又返第二份，咁樣都做咗8年……」女士淚水終於湧出。感覺她從來沒哭過。待她平靜過來，我問：「你從來都唔畀自己喊？」

女士：「想喊，咪諗啲好啲嘅嘢囉，叫自己唔好喊，唔可以畀啲仔女見到。」

我：「你今日開始，幫自己編一個時間，例如逢星期五下午4至5點，令自己喊，盡情喊，夠鐘就停。喊完啲紙巾包好，扔出家外的垃圾桶，同自己講，我又放低咗一部分。」

女士：「吓？特登喊？」

我：「係，情緒要釋放，唔係成日講控制嘅。釋放咗，內心先有空位，慢慢儲番啲開心返嚟。身體知道你曉放鬆，肌肉自然會配合放鬆，頸背先真正會好。」

女士：「咁大年紀，仲去邊度搵開心呀？」

我：「你以前係無機會搵，唔係搵唔到。試吓去長者中心搵吓活動，發掘新興趣。提醒自己而家無嘢要急，行路同講嘢都要放慢。」

那個年代，為生存，不容許有自己。老人家，有機會的話，給自己尋找一下自己，也好讓子女安心。

作者為家庭醫學專科醫生

 

[信健康] 釋放情緒令肌肉放鬆，醫生資訊要留意！【更多健康資訊：health.hkej.com】