心跳啟示

60歲男士，回來覆診高血脂和脂肪肝。檢查顯示血壓正常，惟見心跳率偏慢，每分鐘只有44下。翻查紀錄，原來一直都偏慢。
我：「你今日心跳有啲慢，不過我見一直都差唔多。」男士：「係呀，十幾年都係咁啦，我日日都有寫低嘅。」（他拿出厚厚的紀錄……這麼多年，每天都有寫下，真的十分在意。）我：「有冇覺得咩唔舒服？」男士：「冇。我經常去私家醫院做心電圖，做過心臟掃描都話冇事，但咁耐都慢，我使唔使再睇吓心臟專科？」最近驗血，甲狀腺素正常（因甲狀腺功能減退也可導致心跳慢）。
我：「以前多唔多運動？」男士：「一直都好鍾意運動，幾十年每日游水，退咗休之後更加提升咗運動量。不過心跳仍然好慢。另外呢幾日左邊有啲好痕嘅紅疹，左邊係心臟喎，會唔會同心臟有關㗎？可唔可以轉介我去心臟專科？」檢查其實已經好足夠，因為一直有運動，心肺功能強健，心臟不用跳太多已令身體供血充足，這種心跳慢實屬可喜。左胸皮膚上的是濕疹，和心臟當然無關。
我：「其實我真係唔擔心你心臟有事，但你好在意個心跳，個人顯得好焦慮。最近有冇咩壓力？」男士頓了一頓：「係有啲負擔嘅。我應承自己，3個仔女我每人畀一間屋佢哋，所以我要繼續投資，唔可以畀自己有事。」我：「你3個仔女知道你有呢個打算，有啲咩反應？」男士：「佢哋個個叫我唔好咁緊張，退休就退休喎。」我：「假如你啲仔女真係每人有一層樓，係你送嘅，但佢哋見到你失去咗自己，有焦慮症要食藥，佢哋一世內疚。千萬家財但洗唔去一生內疚，你又點睇？」男士：「我啲朋友都係咁勸我……」我：「好明顯你啲仔女想你開心自在，佢哋先會安心成長，幾大嘅單位都幫唔到啲仔女成長。你應該諗清楚，你係要應承自己，定係應承啲仔女。」男士：「我真係要再認真諗諗……」
男士沒有再要求轉介心臟科。我在想，如果轉介，應該救不了這個人，這個家吧。
作者為家庭醫學專科醫生

[信健康] 心跳隱藏的故事，醫生資訊要留意！【更多健康資訊：health.hkej.com】