驚恐20年

26歲男士，情緒很低落和焦慮，由同事轉介過來跟進。我：「最近有咩令你好難受？」男士：「最近女朋友提出分手。已經一齊兩年啦，一齊咗就應該一世唔分開，所以佢咁提出我真係接受唔到，雖然佢一直對我好苛刻。」這個想法如果出自上兩代的人，我可以理解。但出自一位年輕男士，就有點特別了。這類想法也隱約透露出某些性格特質，和他的家庭及成長一定有關。
我：「你有幾多兄弟姊妹？」男士：「我係獨仔。」我：「細個時父母對你點樣？」男士：「爸爸成日打我，好細個已經開始打。媽媽都有打，但係冇爸爸打得咁緊要。一有唔啱佢哋心意嘅就打。到十幾歲我有番咁上下大隻佢哋先打我唔過。」他現在身形魁梧，但藏着的是一顆驚恐的心。我：「你一定經歷好多難受同不安。你點睇你父母？」男士：「佢哋啲情緒都唔好，我都唔知點樣幫佢哋。」我：「你又擔心父母又憎恨佢哋，又愛又恨呢種感覺真係好難受喎！」男士：「係呀，但父母冇得揀。以前我一聽到佢哋返屋企開門鎖嘅聲我就開始心跳同氣促，之後就成日無端端有嗰啲心跳嘅attack。我咁多年一直唔知可以點處理呢啲感覺。」
我：「而家父母點樣？」男士：「佢哋而家喺英國，感覺佢哋年紀大咗好似成熟咗，唔再暴躁，會關心我喺香港嘅生活。我原諒咗佢哋。」我：「咁就好，你而家可以做番自己啦！你一直以來經歷的是驚恐症。人類需要『緊張』去保護自己，但太多緊張就會令神經系統紊亂而產生很多病徵。你試下由今日開始，如果有發作，首先多謝佢，然後感受佢，慢慢深呼吸同放鬆自己，不需要和它抗衡或害怕，因為呢個病徵係畀你嘅一個提醒。慢慢呢啲發作會減少。而你最近經歷嘅係適應問題，有啲係來自你嘅單一想法，不如學習一下，問下自己想要乜嘢，容許自己有選擇，容許一切都有改變。」
我處方了血清素，約了覆診，他伸出比我大一倍的手掌，說：「多謝你，我終於解決近20年的難題。」我握了他的手，感受到他的力量，也包括他內心的力量。
作者為家庭醫學專科醫生

[信健康] 放鬆自己面對問題，健體資訊要留意！【更多健康資訊：health.hkej.com】