內疚

67歲女士，慢性病覆診時發現有情緒問題，同事着我跟進一下。我：「最近有咩令你難受？」女士：「個女激死我嘞！」
女士已離婚廿多年，跟36歲女兒和6歲孫女同住。女兒也已經離婚。
女士：「個孫一直都係我湊，煮飯洗衫咩都係我做，個女都冇乜理過，咁佢工作忙啦，又做幾高層。最近佢識咗個男朋友，嘩又講粗口又食煙，佢以前都唔會睇得上呢啲咁嘅男人。最近仲話有埋BB添，我真係接受唔到！都唔好咁離譜吖，唉仲要行番我條路（離婚），我都義無反顧咁樣一路幫佢湊啦……」我：「你咁落力湊個孫，因為你一直都好內疚，係咪？」女士眼淚湧上來。我：「幾十年嘅內疚推動住你，你一定好辛苦。」女士眼淚奪眶而出。
我在想，可能女士的女兒也一直為父母離異痛心，一直沒有動力去發展自己。她渴望被愛和聽甜言蜜語。女士一定不想見到女兒婚姻破裂，可惜事與願違。女士為了贖罪，盡心照顧孫女，但與孫女關係太親密，女兒便活不出母親的角色，不能成長，也不能做回自己。家裏每個角色都痛苦，我計劃要提醒一下女士和她女兒的心靈距離。
我：「咁你打算點做？」女士的回應出乎意料：「我忍唔住鬧佢囉，鬧到佢而家帶埋個孫走咗，冇聯絡添啊，我每日祈禱希望見番個孫……」
我差點沒恭喜她。這是個好的方向。世事峰迴路轉，這次輔導竟可直接跳進結論。
我：「對你同整個家庭嚟講，可能係一個好開始。而家阿女有機會真正肩負家庭，做番媽媽嘅角色，處理自己嘅感情。你又可以有番自己嘅時間。你要多啲尋找新嘅興趣，搵番自己。」女士聽後破涕為笑：「真係㗎？係呀我而家去學好多嘢呀，又去運動……」
她心裏知道，終於有機會放低昔日枷鎖，做回自己。她帶笑離開診症室，不需任何情緒病藥物。
作者為家庭醫學專科醫生

[信健康] 放底枷鎖做回自己，健康資訊要留意！【更多健康資訊：health.hkej.com】