對待身體正確態度

52歲男士，評估長期頭暈。紀錄顯示他曾患身心症（Somatization disorder），試過無數精神科藥物，受不了副作用，也被要求入院調校藥物，卻最終決定放棄。

他兩年半前突然在健身室暈倒，頭部輕微碰撞，沒有腦部出血，心臟檢查亦正常。幾天後開始出現頭暈、頭痛、心悸，之後頭暈斷斷續續出現，從未消失。可以做的頭、頸、心臟造影都做了，全部正常。

男士：「入咗幾次院，點解搞咁耐呀？」

我：「搞耐咗有乜問題呢？」

男士：「嗰陣阿媽中咗COVID，老豆又腦退化，要睇住佢哋。我入院嗰陣阿嫲又過咗身，我係佢監護人。」男士單身，和父母同住，他一個人揹起了上兩代。

我：「但就算你成日暈，都幫助身邊人做咗好多嘢，又睇住佢哋。」

男士：「係呀，阿嫲嘅身後事，我出院繼續搞囉。」

我：「其實呢種好難形容嘅暈，都係一種驚恐嘅形態。驚恐最重要概念係乜？就係要面對同感受佢。」

男士：「我都有努力改變，放低好多，成日都有練靜觀、meditation，但都未得。」

我：「呢個方向啱，但爭在一個態度。」

男士：「乜嘢態度？」

我：「回應身體嗰種態度。你好想盡快返去心目中嘅方向同角色，但身體提醒你唔好咁驕傲。暈嘅感覺其實係身體提醒你要休息，面對返自己，唔係永遠付出畀其他人。」

男士若有所思：「我應該點做？」

我：「第一，唔好期望頭暈要消失；第二，每次有暈嘅出現，首先多謝佢，真係心裏面講出嚟；然後先提醒自己感受佢，跟住再做放鬆練習，要記住個次序。你肯做，身體亦都會識做。」

男士：「你講中晒我心入面嘅感覺。希望下次見你嘅時候我有進步啦。」

作者為家庭醫學科專科醫生

[信健康] 應對身體的態度，專科資訊可留意！【更多健康資訊：health.hkej.com】