為健康解籤

43歲男士，由急症室轉介過來跟進高血壓。最近3個月，他常感胸悶，家中量度血壓偏高。一次他背部麻痹，同時發現血壓極高，便到急症室求診。抽血檢查後發現，電解質及心肌酵素正常，心電圖沒有異樣，惟血壓持續高企，急症室處方了血壓藥，着他過來覆診。

這位男士走進診症室，步伐偏快，說話急速，一副焦慮的樣子。他先行遞上家中血壓紀錄，上壓低於135mmHg，下壓低於85mmHg。他暫時沒有其他心血管危險因素，這個家中血壓屬於合格。

我：「最近有冇咩壓力呀？」

男士：「有㗎，準備移民英國。」

我：「咁而家最擔心係乜嘢？」

男士：「身體問題啊，到時唔知頂唔頂得順。」

我：「喺嗰邊打算做咩工作？」

男士：「汽車維修。」男士單身，沒有太多家庭束縛。

我：「雖然今日係第一次見你，但係我感受到你個人真係好緊張。而且你嗰啲心口唔舒服、麻痹、血壓高，好大機會係源自你嘅情緒問題。其實去處理病徵、血壓係治標，處理情緒先係治本！」

男士：「好多人都係咁講，話我個人好緊張，都係嘅，我係成日諗嘢……」他突然頓了一下，然後雙眼圓睜，手指飛快搖動……「呀！我諗起啦！上個月我去日本一間神社，求咗支籤，籤文話咩喺迷霧裏面，要抽出問題嘅源頭咁上下嘅。係嘞，係你今日點醒咗我！」

之後我和他一起制定處理焦慮的方針，他同意嘗試有規律的作息，減少看手機短片，並練習靜觀放鬆方法。血壓方面，我也提醒他少吃偏鹹的食物，並做適量運動。

最後他為自己總結：「最緊要係我mindset（心態）改變。多謝晒。」

作者為家庭醫學專科醫生

[信健康] 心態改變可健康，專科資訊可留意！【更多健康資訊：health.hkej.com】