回應身體

一位46歲男士，首次過來跟進驚恐症。他近年開始服用血清素，情況已經受控。

我：「發作係點樣嘅感覺？」

男士：「我嘅驚恐好特別，係驚有速度嘅嘢；例如飛機加速起飛，而家高鐵呢啲車開得咁快，一定唔得。個心一定揦住痛，唞唔到氣。」

我：「你幾時開始有呢種感覺？」

男士：「嘩……10歲開始就有啦；不過一直唔識，冇睇醫生。」

10歲，驚恐，和家庭及成長總有關係吧？

我：「你細個時屋企係點㗎？」

男士：「我7歲就去德國讀書，父母喺嗰邊做生意；10歲有一次同屋企人去美國，飛機加速起飛嗰陣就有呢一種驚恐嘅感覺，自從嗰次之後，成日都有。」

我：「過到德國嘅生活係點樣？」

男士：「唔知做乜，當時又完全唔識德文，每日都有人幫我補習德文，成個小學階段都唔敢講嘢，唔敢同其他人溝通。」

我：「係一種好難形容嘅驚喎；有冇同其他人講過？」

男士：「冇呀，直到中學我先識得同其他人講吓嘢；之後19歲返嚟香港，覺得呢度先係適合生活嘅地方，就留低咗。」

現在他和太太及兒子同住。

我：「你覺得呢啲痛代表乜嘢？」

男士：「咪驚恐發作囉。」

緊張是身體保護我們的機制，太緊張會讓神經系統過分敏感，例如坐飛機時對速度的改變。

我：「我嘗試從另外一個角度去睇呢啲病徵。其實你好細個已經要面對好大改變，心裏埋藏好多緊張同恐懼。緊張係身體保護我哋嘅機制，但如果太緊張，會令到神經系統太敏感，好似你對速度改變嘅感覺。身體用呢啲病徵提醒你，要你做返自己，自在放鬆。今日你做返自己未？」

男士眼泛淚光。

我：「面對以及感受每次發作，等於你回應身體嘅提醒。用呢一個態度，病情會好快好轉。」

身體對我們最忠誠，記緊多注意和回應身體。

作者為家庭醫學專科醫生

[信健康] 應對自我保護機制，健康資訊要留意！【更多健康資訊：health.hkej.com】