婆婆病人腦退化？

82歲婆婆，如期回來覆診高血壓、高血脂。早前被診斷有輕度認知障礙，正在職業治療部接受認知訓練。

她獨個兒進來診療室。

我：「最近抽血，血糖、膽固醇同埋腎功能都正常，冇問題！」

婆婆很用心聽着，正襟危坐，眉頭緊鎖。翻查紀錄，她在認知評估的分數不算差，自我照顧能力也不錯。但看來很焦慮。

我：「最近記性點啊？」

婆婆：「都係差啲啦，成日唔記得啲人名！」（其實我也不時這樣……）

我：「最近有咩擔心呀？」

婆婆：「唉，擔心個老伴囉，佢準備洗腎（腹膜透析），要洗腎呀，而家陪佢學緊啲程序，唔知搞唔搞得掂。」

我：「有冇啲後生幫吓手呀？」

婆婆：「個仔成日都好緊張，有驚恐症，出親街都話好容易病，又唔敢同佢出街……」婆婆背負着整個家的重擔，壓力可想而知。

我：「你係咪都好緊張？」

婆婆：「我緊張咗幾十年啦！」

我：「你有冇擔心自己？」上一輩常為身邊人奔波，卻忘記了自己。

婆婆：「驚自己愈嚟愈差，唔知咩事，照顧唔到佢哋。」

我：「其實我覺得你仲幾叻喎。你一直情緒焦慮，令到自己好難集中精神。集中唔到，個腦承載唔到資訊，就好似記憶有問題咁樣。其實係情緒嘅問題，唔係個腦退化得咁緊要。所以你要提醒自己放鬆，盡量先照顧好自己，畀啲時間自己出去放鬆吓，走動下，見吓其他人。搞好自己先有能力去幫身邊嘅人。」

婆婆聽完之後，立刻展現笑顏：「今日聽完真係安樂晒，好好多啊，真係多謝晒你醫生！」

用心的解釋，是天淵之別。

作者為家庭醫學專科醫生

[信健康] 放鬆心情迎接生活，健康資訊要留意！【更多健康資訊：health.hkej.com】