孩子像一面鏡 反映父母情緒

8歲男孩，由媽媽陪同進來，看感冒。電腦紀錄男孩有專注力不足及過度活躍症，正接受藥物治療。

男孩有點「坐唔定」。我為他進行肺部聽診時，他想掙脫。

媽媽對孩子猛吼：「你乖啲，畀我好過啲得唔得？」

孩子稍為安靜下來。我完成聽診後，男孩逕自爬到體檢床上躺下，望着天花板。

我對男孩說：「剛才媽媽想教你安靜喎？」男孩繼續東張西望。

我：「你聽完唔係好開心呢。我而家畀個機會你教媽媽一樣嘢，你會教佢乜嘢？」

男孩：「我會教佢安靜囉，佢成日都好嘈。」

我：「咁你會點樣教媽媽呀？」

男孩：「我……會寫兩張紙送畀佢，兩張『安靜』，一張貼喺房，一張貼喺廁所！」

我：「哦，咁使唔使寫張畀爸爸？」

男孩：「爸爸喺屋企唔多講嘢嘅。」

大概可以了解這個家庭的互動。

媽媽：「咁喺屋企兩兄弟嘈，係咪唔使叫佢哋收聲？」男孩有一個弟弟。

我對媽媽說：「其實小朋友嘅行為問題，好多時來自屋企人嘅情緒同氣氛。小朋友係一面鏡子，反映大人嘅行為。大人處理好自己嘅情緒，夫妻關係和睦，小朋友就會安心，做返自己，安靜落嚟。」

小孩像一面鏡子，反映大人的行為，大人處理好自己情緒，小朋友才會安心。（網上圖片）

我隨即轉向男孩，和他說：「不如咁啦，我叫媽媽喺屋企安靜自己，你又喺屋企安靜自己，咁樣好唔好吖？」

男孩立刻給我一個OK手勢，很興奮的說：「好啊，我同細佬比賽一星期，睇吓邊個安靜啲。」然後走到媽媽身邊，摟着她。

我對媽媽說：「喺屋企可以試吓學我咁樣，先關注小朋友嘅情緒，理解佢哋諗乜嘢，唔使咁用力。」媽媽摟着孩子，向我合十，眼角早有淚光。

作者為家庭醫學科專科醫生

[信健康] 處理孩子個人情緒，精神資訊要留意！【更多健康資訊：health.hkej.com】