懶一下

一位72歲女士過來跟進甲狀腺功能問題。最近血液檢查顯示甲狀腺功能正常。但看着她過往的病史後，我就決意把握機會和她討論一下情緒問題。

女士進來，一副很精明的樣子，對答不時夾雜英語，卻感覺她很繃緊。

我：「最近有咩令你好緊張？」

女士：「我不嬲都咁緊張嘅，不過呢輪成日好攰好懶，冇乜做運動，成日鬧自己做乜唔郁。」

我：「好矛盾喎，點解係鬧自己呢？」

女士：「我對咩都有要求㗎！」

女士年輕時是會計經理，職位頗高。女兒小學時，她已決定舉家移民英國。近年女兒想在工作上有更多發展，主動要求回流，全家再次定居香港。

她退休後仍在學習，又很擔心女兒的工作。

她有七兄弟姊妹，自己排行最小，萬千寵愛。小時家境窮困，父母覺得女兒身不用讀書多。她不認同，不斷要求自己做到最好，力爭上游。

我：「幾十年嚟，你咁努力，係做畀邊個睇？」

女士想了半晌答：「都係畀自己睇。」

我：「難怪你個身體咁辛苦！知唔知道你覆診開嗰啲病症，全部都可以同情緒有關？」

病歷顯示，她有眼瞼痙攣、消化不良，以及驚恐發作，全部覆診不同專科。

我續說：「你一直對周圍嘅人都好在意，就係唔在意自己嘅身體。你令到身體好操勞，身體而家發出啲聲音提醒你，就形成你現有嘅病徵。攰當然都係一部分啦。你應該畀自己懶下，等個神經系統放鬆吓，你身體嘅病徵自然會紓緩。否則，食咩藥都係一樣。」

人徘徊在極端，就是痛苦。中庸真的不錯。還要面對自己，才能活得自在。

作者為家庭醫學專科醫生

[信健康] 身心鬆一鬆活得更自在，精神資訊要留意！【更多健康資訊：health.hkej.com】