誰願濫藥

30歲男士，前幾天被發現昏迷於工作地方，頭、腳多處瘀傷，身上藏有一支喝剩小半的咳水，入院檢查後，幸好沒有骨折。他承認濫藥，已轉介精神科跟進。由於身體多處痛楚，未能上班，需要續假。他由父母攙扶下進了診症室，眼神渙散，面容疲憊。

我在想，如果人沒有痛苦，會選擇汽水多於咳水吧？還來個跌碰滿身傷痕……

替他檢查身體後，我道：「如果咳水係用嚟逃避痛苦，最近乜嘢令你咁痛苦？」

男士：「無嘢。」但身後母親猛力點頭，搶答：「做嘢唔開心囉。」

男士不置可否，其實沒向父母表達過。

母親：「佢乜嘢都唔講嘅，個老豆就乜嘢都緊張。」原來父親兩年前輕微中風，常常覺得自己快離開世界，希望兒子生生性性（但其實看來十分精神，行動自如）。父親自幼失去父母，自己學習成長，經常恐懼焦慮，要依賴身邊人，常常說兒子是他生存的動力。

母親也只是擔憂丈夫和兒子，口裏不停教訓，顯得焦躁。

男士一直伏在我案頭，不表達意見。是不想父母擔憂吧！這家庭，3個人，都為對方苦惱，都忘了自己。

我對父母說：「我覺得我哋要幫呢個年輕人做番自己，但首先你哋要搵番自己。」

我向着父親：「你由今日開始要成長，學習堅強喇，你角色係承擔家庭，反為仲要個仔嚟支持你生命？」

我向着母親：「你唔好成日望住個仔同老公，望吓自己，多搵節目畀自己（當然小心疫情），咁先有空間畀身邊兩個男人成長！」

我拍一拍這個年輕人：「你，見到兩老改變後，你要做番好自己。有冇一句說話同父母講？」

男士雙眼通紅望住父母：「你哋唔好咁緊張就得㗎喇。」

臨離開，三人同時向我道謝。再望這年輕人，眼神堅定，腰板挺直，判若兩人。

作者為家庭醫學專科醫生

 

[信健康] 適當表達避免濫藥，醫生資訊派用場！【更多健康資訊：health.hkej.com】