關心健康警號 安靜面對自己

62歲女士，情緒低落，有自殺念頭，同事緊急轉介跟進。

女士衣着端莊，但神情落寞，由丈夫陪同進來。

女士：「我兩邊耳鳴不斷，好大聲，好難受。」

耳鳴持續了一個月，十分困擾，影響睡眠；只有在短暫睡着時聽不到。

我：「有冇評估過係咩事？」

女士：「我睇咗7個專科醫生，耳鼻喉、神經、血管、心臟都check過，MRI、CT照齊晒。」

我：「有何結論？」

女士：「沒有。」所有檢查都正常。

她接着說：「好辛苦，好想快啲離開呢個世界。我冇仔女，但係都唔捨得身邊咁好嘅丈夫，佢真係對我好好。」

聽到這個turning point便較好辦。我鼓勵她先保證自己人身安全，不要傷害自己。

我：「你好在意身邊人嘅感受喎？」

女士：「係呀，我想身邊嘅人個個都開心。我去到邊度都係好受歡迎嗰個，有好多朋友，最鍾意同佢哋一齊打高爾夫球、揸車出去兜風。」

我：「有冇啲活動係自己一個人都好享受嘅？」

女士想了一會：「咁又冇乜。」

丈夫補充：「佢成日走去幫其他人㗎，雖然個人好開心，但估唔到而家變成咁……」

耳鳴其中一個常被忽略的原因是情緒焦慮不安，應容許自己用更多時間聆聽內心聲音。（網上圖片）

我：「其實耳鳴有一個常被忽略嘅原因，就係情緒焦慮不安。你好在意身邊嘅人，好想遷就他人，亦想自己喺人哋面前開心。要做到呢樣嘢，你必須抑壓或隱藏真正嘅自己，所以你一直好少有真正嘅自我。身體好想提醒你，應該安靜注視自己，容許有多啲個人嘅空間、時間，同埋自己嘅諗法。平時累積嘅心思意念可以造成神經紊亂，所以聽覺神經亂晒龍。呢一個耳鳴係身體提醒你去聽，聽乜嘢？就係聽返自己嘅聲音。」

我同時為她處方了抗抑鬱藥。其實身體常常引導我們正確的方向，可惜很多人只在意外邊的世界，不願意靜下來面對自己。

作者為家庭醫學科專科醫生

[信健康] 聆聽心聲可控情緒，精神資訊要留意！【更多健康資訊：health.hkej.com】