為家庭犧牲的女孩

冼銘全醫生 | 2021-04-21
家庭醫學,正是在提醒大家,身體、情緒和家庭相互影響,不能分開。很多身體問題,不是醫藥或手術可以解決的。

疫情下,許多情緒問題浮現。

43歲女士,近半年常感頭暈、心跳、口乾,身體檢查、抽血、心電圖完全正常。病徵明顯和情緒有關。她與丈夫和10歲女兒同住,最近常留家中,與女兒多了爭執,焦慮不斷提升,十分困擾。我着她帶女兒來談談。

女士:「唔知佢肯唔肯嚟睇呢。」我:「你同阿女講,話媽媽情緒唔好,醫生想屋企人畀啲意見,阿女一定肯嚟。」女士有點疑惑。

兩周後,女士和女兒一起進來診療室。我向着女兒:「多謝你今日過嚟。我哋一齊幫吓媽媽。」然後轉向媽媽:「最近心情點樣?」

媽媽:「我好痛苦,就嚟癲,呢個女又唔聽話,枉老師仲話佢喺學校好乖,其實喺屋企成日發癲大叫!」(女兒靜靜坐着,感覺不到半點反叛氣息。是在家裏扮演不屬於自己的角色?)我問女兒:「大叫係為咗邊個?」女兒:「希望爸爸多啲注意我。」原來爸爸一直只顧工作,回到家裏常發脾氣,還會抽打女兒。媽媽補充說:「有時仲用棍打。」

我:「你逃得掉爸爸的棒打?」女兒點頭。我:「咁危險仲大叫大嚷?」女兒:「當幫爸爸發洩一下情緒……」媽媽開始拿紙巾拭淚。

我:「你亦都擔心媽媽?」女兒點頭。我:「你想改變媽媽乜嘢?」女兒:「想佢多啲鼓勵我,唔好鬧我……」小朋友已忍不住眼淚。我的心戚着,忙拿紙巾給她。

媽媽:「咁你係叫極唔聽又唔畀心機讀書……」我向着媽媽:「阿女犧牲自己,成日要吸引你哋注意,幫你同丈夫站回同一陣線,但換來嘅係不聽話罪名,甚至痛罵同毒打,仲邊有心機讀書?」媽媽一愣,然後緩緩伸出左手,女兒拖着,母女相擁而哭。

媽媽一邊為女兒拭淚,一邊說:「唔怪得上次我哋話離婚你咁大反應,我哋講吓咋……」場面感人,我也強忍着(在病人面前落淚總覺有點不太專業)。

這位女士終於明白,要處理好夫妻關係,才能讓小朋友專心成長。

家庭醫學,正是在提醒大家,身體、情緒和家庭相互影響,不能分開。很多身體問題,不是醫藥或手術可以解決的。

作者為家庭醫學專科醫生

 

[信健康] 情緒家庭相互影響,心理資訊派上場!【更多健康資訊:health.hkej.com

熱門話題