大仔發高燒急入院 孫慧雪籲小心腺病毒 「酒精都殺唔死」

藝人孫慧雪跟丈夫育有兩名兒子，日前她在社交網上載新相，分享6歲大仔羅駿滐（Riley）日前感染腺病毒，發高燒要入院治療，她留言：「本來參加緊童軍活動，佢突然有少少面青口唇白，然後同我講佢肚痛無胃口仲想嘔，因為有少少感冒症狀+肚痛，2種症狀以上，所以醫生即刻判斷出佢係病毒感染，不過當時未知係邊一種病毒，當晚佢就開始發燒啦，到咗第三日佢突然發冷高燒唔退，我哋就即刻送咗佢去醫院，醫生一見到佢，就判斷出佢係腺病毒，要即刻安排入院，化染嘅結果亦顯示佢真係中咗腺病毒。」

孫慧雪指Riley目前情況穩定，不過仍未出院，她提醒家長要小心腺病毒：「呢隻病毒傳染性極高，酒精殺唔死，如果中咗，病期亦都好長，亦會反覆感染！入院嗰晚佢燒到40.4度，真係好彩我哋有送佢入醫院，醫生安排佢吊鹽水，打點滴，入面有抗生素，仲定時畀退燒藥佢，今日已經係住院嘅第四日啦！精神好咗好多，但係都會突然又燒返！所以仲未可以出院！如果小朋友發燒幾日都未好，家長們真係要留神呀！」