放下才是擁有

75歲女士，血壓控制不穩，已遵照醫生處方服藥，惟她的血壓仍常高企，上壓高達190mm Hg，下壓高達100mm Hg（正常家居量血壓，上壓應低於135mm Hg，下壓低於85mm Hg），抽血測試、小便抽驗等已排除內分泌系統原因。她十分擔心自己的血壓問題，每天量度血壓6次，並整齊地記錄在拍紙簿中；她說話很快，手勢很多，狀甚焦慮。

我：「其實你最擔心血壓高會有乜嘢後果呢？」

女士：「會爆血管㗎嘛！我仲要睇住啲仔女同孫㗎喎！」

女士似乎想把整個天下扛在肩頭。

我：「嘩，我睇你個人都幾犀利喎！」

女士：「係呀，全家最讀得書係我。」6兄弟姊妹中，她排行第2，上一代重男輕女，只供男孩上學，「我一直是自己賺錢讀書」。她說這句話時，眼角有着淚光。

我：「你成日為其他人付出，自己唔辛苦咩？」

女士猶豫了一下：「幫人好開心嘅。」

我：「係，但做人要攞個平衡嘛。幾十年嚟身體太攰啦，你神經系統又太過操勞，瞓得唔好，血壓點會唔高？」

女士的眼淚已禁不住：「我係成日為其他人，辛苦咗自己……」

她平靜一會後續道：「我退休之前都成日喊㗎，嗰陣時好努力做嘢，但係上司特登寫衰我嘅File。臨退休先知，自己希望為公司填補漏洞，最後發覺呢啲漏洞根本係公司設計出嚟希望吸引更加多客戶；之後我已經喊唔出。」

我：「你要容許自己啲眼淚喊出嚟。你以前淨係為人，而家要為吓自己啦，放低一啲身邊嘅人，搵多啲開心畀自己，搵啲新興趣，血壓就會好㗎喇。」

我給她的廣泛焦慮開了藥，她欣然接受（之前她拒絕所有情緒藥物）。

臨離開診症室時，她說：「對自己好啲，食藥聽話，多謝醫生！」

作者為家庭醫學科專科醫生

[信健康] 釋放自己覓新興趣，專科資訊可留意！【更多健康資訊：health.hkej.com】