內心平靜 驅走焦慮

45歲女士，由同事轉介來跟進焦慮狀況。她任職體育裁判，最近因判決問題和女上司產生糾紛。

我：「你做咗呢行幾多年？」

女士：「3年。其實我做過好多行業。我特別同啲女人夾唔到，覺得啲女人好煩，同男人相處就舒服啲。」

我：「你有幾多兄弟姊妹？」

女士：「無。」

我：「細個時父母對你點啊？」

女士：「我阿媽有嚴重嘅精神問題，應該係狂躁症。佢又打我，又打阿爸。細個放假時，阿媽會將我鎖喺間房入邊，我睇住啲小朋友可以去玩，好難受。佢又成日同爸爸嘈交。只有爸爸對我關愛，乜嘢都支持我。」

這女士正正投射了她媽媽的形象。

我：「真係好難受嘅經歷。你有冇向父母表達吓自己感覺？」

女士：「有次我話我真係好想離開呢個屋企，真係頂唔順。嗰段時間佢哋嘈少啲。」

我：「自己同先生相處點樣？」

女士：「我好似複製緊上一代嘅問題，自己同先生都成日發脾氣。」

我：「你原生家庭狀況，令你時刻警覺身邊人嘅狀況。漸漸你嘅眼目就放喺其他人，而忽略咗自己。你而家要開始試吓多啲搵返自己。開始時可試吓寫低自己嘅感覺。遇到嘅係開心、嬲、好矛盾，都用文字表達，再同先生分享一下。搵啲自己真正享受嘅活動。呢個係你修煉嘅第一步。」

女士：「好，多謝，我試下。我成日覺得如果人類冇咗情緒就好。」

我：「如果人類冇咗情緒，就會完全被AI取代，人類可以滅亡。」

女士：「仲有我成日都有耳鳴，睇極都唔好，我成日想老咗最好係聾嘅。」

我：「耳鳴其中一個原因都係焦慮。如果你內心有真正嘅安靜，你會喜歡容納更多聲音。」

作者為家庭醫學專科醫生

[信健康] 淺談緊張焦慮症狀，專科資訊可留意！【更多健康資訊：health.hkej.com】