學懂面對焦慮症

54歲男士，由私家醫生轉介過來跟進高血脂及心血管問題。

男士快步走進診症室，正襟危坐。他帶着一大疊身體檢查報告，有詳細心臟檢查包括超聲波、24小時心電圖、心血管電腦素描。只見他心血管有輕微阻塞，其餘檢查均屬正常，膽固醇數字亦理想；但我有興趣的是一大堆檢查的背後。

我：「你因為乜嘢唔舒服所以去做Body check？」

男士：「其實我2010年開始已成日覺得心跳。」他任職銀行，主管金融市場，工作壓力極大，經常早上5時因心跳醒來，也常冒汗、心悸，說不出的難受，但多次檢驗甲狀腺功能也正常；提到家庭，他說有兩個孩子，沒有再說下去。

我：「這10幾年以來，你對自己嘅心跳有冇一個答案？」

男士：「唔係因為膽固醇高嗎？」

我感覺晴天霹靂；對這個社會最擔心的是，大家對個人情緒的認知和處理。

我：「你一入嚟嘅時候，已經見你身體唔識得放鬆。你嘅焦慮不安已累積咗10幾年，身體負荷唔到，作出投訴。你嘅交感神經活躍到一個點，令你出現好多病徵，心跳只係其中之一。」同時感受到他是一個不懂表達自己的人。

最後我介紹他幾個放鬆的練習，着他好好改變。當藥單從印表機滑出，他吐出意想不到的一句：「其實我好傷心……」

我見他含淚昂首，便靜待他的表達。

他緩緩開口：「其實太太想同我離婚。我好內疚，以前剩係得工作，乜都推畀太太做，我抵死……而家成日寫日記抒發……」眼淚已奪眶而出。我鼓勵他學習先面對自己，處理好焦慮症，坦白和太太說；這不是扮可憐，而是成長的第一步。他突然變得正面，在仍有淚光的眼中，我看見另一個他。

作者為家庭醫學專科醫生

[信健康] 分享應對焦慮症，專科資訊可留意！【更多健康資訊：health.hkej.com】