心悶提醒 給自己多點空間

54歲女士來覆診高血脂，抽血顯示膽固醇及三酸甘油酯正常。她提到常常心悶、氣促，維持數分鐘。要深呼吸才感到舒適。在內地做了心臟血管顯影，報告正常。

我：「平時有冇乜嘢壓力？」

女士：「其實我都唔知應該由邊度講起……」

心悶、氣促，未必一定是心臟問題，或與生活壓力太大有關。（網上圖片）

她星期一至五上班工作，周末趕回內地照顧父親，休息時間很少；她七歲時母親過身，父親再娶，從小照顧弟妹，幫忙做家務，感覺都是不斷為人付出，沒有自己。

我：「點解唔畀自己放鬆一下？」

女士：「唔照顧身邊嘅人，我就覺得好內疚。」

我：「邊個逼你咁樣做？」

女士：「咁就冇，先生都鼓勵我要畀多啲時間自己。」

我：「爸爸情況點樣？」

女士：「有家姐睇住，但呢兩年返去，爸爸都只係望住我，然後好多嘢唔敢講。」

我：「佢察覺到啲乜嘢？」

女士：「佢好似見到我好緊張、掹得好緊，所以唔敢同我傾偈……點解你會知道嘅醫生？」

我：「如果而家容許你乜都唔使理，你最想做乜？」

女士：「行吓街囉，一直行，可以唔使諗住幾時返去煮飯，想有多啲自己空間。」

我：「先生要求你返去煮飯？」

女士：「冇，係我覺得一定要咁樣做。先生有時想表達一下，但始終都係冇講。」

我：「因為大家見你咁辛苦，你又唔改變，都感到唏噓。希望你今日開始做返自己，身體自然會放鬆，身邊嘅人都會更加好過。你嘅成長經歷成為你嘅陰影，推你向前衝咗幾十年，而家要多謝身體陪你衝咗幾十年，更加要多謝啲心悶『提醒』你，可以做返自己，重新過日子。」

她含淚道謝：「今日好幸運，你肯咁樣同我傾偈。多謝你！」

作者為家庭醫學科專科醫生

[信健康] 壓力大易心悶氣促，健康資訊要留意！【更多健康資訊：health.hkej.com】