三部曲之絕處求生

面對突如其來的噩耗，正如溫女士一樣，多數人都會感到無助及消極。

「始終是癌症轉移，處理上面係要花多啲工夫，而且治療嘅成效、副作用及後遺症都會令你十分擔心。」我說。她仍嘀咕道：「點解我會有肺癌呢……」

「吸煙的確係導致癌症的主要原因，但有部分肺癌是因為基因突變，與吸煙並沒有太大的關係。」我續道。「治療嘅前景往往取決於癌細胞的性質、擴散的程度及針對癌細胞治療嘅成效。」她點頭說：「唔講手術，剩係電療化療嘅副作用我已經受唔住。」

「大部分人眼中，電療及化療等同辛苦、併發症、副作用。但近年癌症上嘅治療有很大發展，例如標靶治療、免疫治療都能有效地針對癌細胞；療效提高之餘，副作用亦大大減少。」我續說：「以你為例，中年不吸煙的肺癌病人，大概七成機會標靶治療會有幫助。而定位放射治療（SBRT）比傳統電療，特別在脊椎轉移的情況，更能以高放射劑量消滅癌細胞，同時減少對正常組織，包括皮膚、內臟及脊髓的傷害。」「明白。」她臉容稍為放鬆：「既然已經擴散去脊椎，點解仲要捱一刀呢？」

「以往當癌症已擴散，治療選擇不多，以紓緩治療為主，因為已擴散癌症的前景不太理想，手術的幫助亦相對有限。」我說。「近年抗癌嘅治療成效大大提高，病人的前景亦相對改善；手術對於病情嘅控制例如骨折導致的疼痛、神經受壓、併發症嘅預防，以及生活質素提升，都有着愈來愈重要的位置。」

「當然，並不是每個病人都需要手術，如初期的轉移並沒有影響結構及脊髓神經功能就唔需要，當擴散範圍太廣泛或者身體狀況太差，其實都不適合做手術。」我回答。

「其實呢個星期行路開始有啲唔穩定了……」她說。

作者為骨科專科醫生

 

[信健康] 認識癌症治療，醫生貼士要留意！【更多健康資訊：health.hkej.com】