為自己打氣

冼銘全醫生 | 2022-03-23
埋藏咗好多恐懼和痛苦,無表達出來,所以個身體幫你表達。愈不安,血壓就愈高,然後你愈擔心,形成了一個惡性循環。

50多歲男士回來覆診高血壓。上次看醫生時表示腹痛多時,加上多年前輸尿管結石病史,同事已轉介到泌尿科,但排期至明年。
我:「最近肚痛如何?」男士:「下腹常陣痛,一樣,無好過。」我:「幾時開始咁樣痛?」男士:「2017年。」他不假思索地道。他還每天腹瀉,可體重沒大改變。2018年大腸鏡檢查正常。不似是泌尿問題。
我:「2017年發生咗咩事?」原來他2017年遇上交通意外,一直腰背痛、腹痛,不斷看醫生,也沒有再上班。
我:「屋企仲有邊位?」男士:「太太,兩個女,而家最擔心兩個女,因為兩個都唔打得針,我血壓又高,又唔敢打,影響埋兩個女,都唔知點算。」面對疫情和疫苗,大家都有不少壓力。
我:「兩個女咩事?」男士:「大女兒20歲,最近做了心臟手術,而且經常頭痛,醫生說不適宜打針。小女兒又有腫瘤,醫生說也不適宜。」他不斷在想身邊的人。
我:「呢幾年你兩個女有冇對你講啲乜嘢?」男士:「細女話叫我唔好咁緊張,快啲返番工喎。」我:「唔好介意,請問你有幾多兄弟姊妹?父母以前待你如何?」男士:「3個,我排行最細。啲阿哥唔爭氣,我十幾歲就要出嚟做嘢幫補屋企,咩都搵我做……」
我:「先生,雖然第一次見你,但我感到你一直顧住背負其他人,好似無咗自己咁。你埋藏咗好多恐懼同痛苦,無表達出嚟,所以個身體幫你表達。例如你嘅腹痛,好大機會係腸易激綜合症,你個人愈不安,你條腸就愈不安,血壓就愈高,然後你愈擔心,形成了一個惡性循環。如果你能夠放低一啲過去,集中做番好自己,相信你嘅身體同家庭成員都會好受好多。」
男士呆在那裏,在思考。我也要喘息一下。戴着高規格口罩和面罩還要不斷引導病人,十分辛苦,但值得。請大家為自己打氣,也為極度勞累的前線醫護打氣。
作者為家庭醫學專科醫生

[信健康] 放低過去做好自己,醫生資訊派上場!【更多健康資訊:health.hkej.com

熱門話題