要父母聽話

38歲女士濕疹發作頻密，同事懷疑和壓力有關，轉介過來跟進。女士和丈夫及5歲兒子同住。她表示兒子常不聽話，深感有壓力。
我：「小朋友咩時候最唔聽話？」女士：「如果淨係得我同佢還可以，但如果爸爸喺埋度就煩啦，癲晒。」我：「例如點癲？」女士：「例如尋日過馬路咁，爸爸喺度，佢特登行出啲斑馬線度，咁危險㗎嘛，我捉番佢入嚟，佢就掙扎喺度扭計。平時淨係得我同佢就唔會咁嘅。有時覺得做乜都教唔到個仔。」
我：「爸爸當時點做？」女士：「佢仲鬧番我轉頭！ 我同老公講，你唔好理我點教佢，總之你唔好破壞我心思！我已經盡晒力！」我：「阿仔喺學校表現係點？」女士：「老師話佢喺學校好乖，講到成個模範生咁，我真係諗極都唔明，我做錯啲乜嘢。」
我：「你無做錯乜嘢，不如試吓咁諗。你個仔有高級智慧，只係未識充分用口表達。佢好在意爸爸媽媽開唔開心，好想用自己作為教材，教導父母合一，所以用反叛行為嚟測試你哋，睇睇你哋做唔做到方向一致。喺學校或淨係你哋一齊時，毋須判決，佢就唔使演叛逆，安靜做番自己，但仍時刻觀察你嘅情緒。」女士：「咁都幾合理，但有啲時候都係難解釋。好似今日，佢幼稚園畢業表演綵排，我趁嚟覆診之前過去同佢影吓相啦，點知佢見到我，耍手擰頭叫我快啲走喎，老師見到都覺得好奇怪，話見到媽咪唔係應該好開心咩？」我：「佢知唔知你今日嚟覆診？」女士：「知，我同佢講咗。」我：「佢在意你要處理好自己，多過佢自己嘅畢業綵排，想你快啲去見醫生，咁樣合唔合理？」女士目瞪口呆，突然大叫：「通啦，通晒啦，咁多年終於解釋到啦！」
我建議她和丈夫多討論如何介入兒子行為，要講求同一方向，也要注意情緒。很多孩子與生俱來就擔心父母，要承擔父母的情緒，令自己情緒行為也出現問題，但總被人標籤成行為問題或精神病（常見如過度活躍和自閉傾向），其實最需要處理的，是父母自己的關係。
作者為家庭醫學專科醫生

[信健康] 注意情緒行為的影響，醫生資訊要留意！【更多健康資訊：health.hkej.com】