自揭單親留心理缺陷 梁朝偉勉基層學童

著名影星梁朝偉昨日到油麻地出席香港小童群益會、香港兒科醫學會等籌辦的獎學金頒獎禮，梁朝偉罕有分享年幼時的單親生活，他說：「我都係來自基層家庭，每個人都有啲缺憾，無論喺生理上或者心理上，我自己都係。我係單親家庭長大，記憶中，6、7歲嗰陣爸爸就消失唔見咗，我同妹妹都係由媽咪一手湊大。」

梁朝偉說中學未畢業就出外工作幫補家計：「我覺得自己好幸運，喺社會工作出咗5、6年後，就搵到一份自己好有興趣嘅工作。喺工作期間中，我知道自己讀書唔多，但係可以自己進修同自修，除咗努力學習，認真對待每個工作。我唔敢講今日自己好成功，但係起碼做到自己心目中嘅要求，我覺得同大家一樣，只係個普通人，如果我都可以，我相信所有人都可以。」

梁朝偉今年初開設抖音賬號，並拍片指自幼受到父母異離影響，令他怕跟其他人溝通，性格亦因此變得孤僻，不會表達自己之餘，在人多時還會害怕，長大後更一度確診社交恐懼症。