有一種溺愛

61歲男士，有焦慮抑鬱情緒，服用血清素後有明顯改善，唯仍有點悶悶不樂。他與太太和獨子同住。

男士：「擔心個仔，三十幾歲，未婚。」

我：「呢個係佢嘅人生，你未必適合給太多意見。佢有無拍拖？」

男士：「有，不過表現得好唔積極，叫佢組織家庭，佢話可有可無。我連間屋都俾埋佢㗎啦，轉咗佢名。唉，我幫佢洗衫，日日煮埋飯俾佢，佢都係咁態度。」

兒子的情緒固然需要評估，但眼前這個父親，也應作些改變吧。許多父母認為盡量供給子女所需，他們便應該有動力成長。太多供應或期望反而限制了孩子的自主，也讓父母失去了自我。結局是，一家三口，大家都做不回自己，都在痛苦中。

我：「太太點睇？」

男士：「太太都錫個仔，不過都開始頂唔順。佢仲有一年就退休，都有諗過我哋兩個搬走，過吓兩個人嘅生活。」

我：「你自己點睇先？」

男士：「可能都要改變吓……」

原來最離不開孩子的，是這位男士。其實最需要成長的，是他自己。

我：「個仔冇動力，可能係因為佢根本冇機會發展，你所有嘢都安排好晒俾佢，佢都冇咩需要自己計劃或者奮鬥。你呢個年紀，反而需要認真思考吓重新發展，俾返啲空間個仔去闖蕩一下。你同太太搵啲新興趣，搬出去都好，個仔又過吓獨立嘅生活，呢個家庭關係先算健康。要改變一下啦，如果人生欠缺自己，到時個仔成家立室，你會更加失落。」

男士突然好有信心咁講：「啱，呢個世界無後悔藥食，希望方向啱，以後唔好日日後悔。多謝醫生！」凡事都是一種平衡。

作者為家庭醫學專科醫生

[信健康] 淺談過分溺愛孩子，醫生資訊要留意！【更多健康資訊：health.hkej.com】