強心針

62歲女士，回來覆診高血壓、糖尿。她精神不錯。

電腦資料顯示，她在外科覆診，最近發現左邊肺部上方出現陰影，一星期前做了活組織分析，確定是惡性細胞。因還未到覆診期，她仍未知道這細胞檢查結果。女士曾有上頜骨癌，2020年接受了手術治癒。她血壓和血糖指標都很穩定，我趁機關注一下她的近況。

我：「外科嗰邊都有覆診緊喎！」女士：「係呀，好擔心。嗰邊醫生話個肺有啲嘢，佢話一睇就知係啲唔好嘅嘢，不過需要肯定一下。唔搞㗎啦，太痛苦喇……」她眼眶濕潤了。

我：「知道你呢幾年經歷咗好多。」女士已逕自拿出紙巾，抹着眼角的淚。「唔搞啦，捱得過個手術，之後又唔知要點樣治療，又唔知係咪有擴散。我都62歲，差唔多啦。」再拭眼淚。

原來女士獨居，丈夫年前已過世，沒子女。主要支援來自朋友和教友。我讓她安靜一下，再問：「嗰邊醫生點講？」她：「嗰邊醫生好有信心喎，話切咗佢得㗎啦今次，等齊報告再傾喎。」我：「你嘅負面諗法，係嚟自情緒低落。你睇出嚟嘅世界，同現實嘅世界係好唔同。現實係可能好容易搞得掂。62歲，現今嚟講其實好後生㗎咋！人生在世其中最重要係兩個字，無悔。無悔係要盡力、努力過，唔係顧住諗有咩可能。」

女士：「你都贊成我去醫呀？」我：「而家放棄嘅話，比賽就結束啦（出自一部有關籃球嘅著名日本動畫）！因為情緒嘅低落影響到決策，真係太唔值得。」女士：「係呀，我身邊啲朋友、教友個個都叫我去醫㗎！」我：「好多人支持你，應該足夠令你唔再負面吧！」女士展現了笑容：「好多謝你醫生，你今日幫我打咗支強心針呀！」她離開診症室的步伐，帶着信心。

作者為家庭醫學專科醫生

[信健康] 鼓勵面對患病治療，醫生資訊要留意！【更多健康資訊：health.hkej.com】