勇氣

81歲婆婆，獨居，丈夫離開了7年，情緒仍未好轉。我：「而家有冇成日諗起先生？」婆婆：「有，我每朝起身，就對住枱頭佢幅相講嘢。」7年。我：「講啲乜嘢？」婆婆：「話佢聽我好想去天堂見佢，話佢知我個腎愈嚟愈差，但我唔會搞㗎啦……」我：「點解唔搞呢？」其實她腎功能並非太差，但婆婆內心全是負面情緒。

婆婆：「我先生癌症走㗎，當年就係聽醫護講話做化療，點知做完化療之後差得仲快，早知唔好聽醫護講去化療。所以我唔會搞個腎㗎啦！」我：「你話好想上天堂見佢，咩令你而家仲留喺人間呢？」婆婆：「我聽講自殺上唔到天堂，我真係掛住佢，佢真係為我做咗好多嘢……」我刻意寫下「佢為我做咗好多嘢」這一句。

婆婆：「佢好照顧我嘅，我哋形影不離。可惜咁早走。當年呀，有個護士長同我講啊，話佢自己堅持做化療嘅。」
機會來了。我：「你知唔知點解先生咁堅持做化療？」婆婆：「唔知。我應該一早勸佢唔好做。」我：「你仲未明白？呢個係你先生嘅心意之一。」婆婆不語。

我：「佢用生命教你咩叫勇氣啊。勇氣係喺未知嘅情況底下繼續向前行，只望住前面，唔諗結果。如果當時大家同埋醫護嘅決定係要幫伯伯而進行化療，你就唔應該用個結果嚟衡量番呢個決定。你話你先生為你付出咗好多，咁呢幾年你為先生付出過啲乜嘢？你先生喺天堂見到你咁樣嘅情緒，每日講啲咁負面嘅嘢，你估吓佢有咩感覺吖嗱？」婆婆不住點頭。「我哋見到你經歷嘅痛苦，不過都係時候畀啲勇氣你先生睇，望住前邊，過好自己生活。由聽朝開始，同先生講一樣開心感恩嘅嘢先。令自己開心啲，同時間令到上天嘅先生見到你個背影可以放心，得唔得？」

婆婆望着我笑，話今日開心番。「我今晚就同佢講，今日遇到好醫生，感恩。」

作者為家庭醫學專科醫生

[信健康] 勇氣面對患病經歷，醫生資訊要留意！【更多健康資訊：health.hkej.com】