李樂詩分享治癌感受： 要珍惜每一段時間

現年48歲的歌手李樂詩近日接受陳志雲網上節目訪問，談及去年8月她患上乳癌，經過8小時切除乳房手術的點滴，她更寄語女性一定要每年進行身體檢查。她說：「每年我都會做身體檢查，就發現有乳癌，冇諗過我會有cancer，我飲食都健康，又有做運動。知道之後好唔開心，唔知道有幾嚴重，唔知自己有幾耐命，因為我有三個仔，佢哋都好細。我好擔心，我第一時間同老公講，佢都好surprise。」
幸好李樂詩的癌症只屬初期，可以做手術解決，她說：「兩邊都要割除，唔使做電療、化療，所以每年驗身係好重要。」經歷這場大病，亦改變了她的人生觀，李樂詩說：「開心自己仲喺度，每樣嘢都要樂觀去睇，每個人都會死亡，要珍惜每一段時間，因為人真係好化學，我都有朋友無端端心臟病而唔喺度。而家小朋友要喺屋企開Zoom上學，以前我會好嬲、好激動，『做咩睇YouTube？你唔係讀緊書咩』，但而家唔好令自己唔開心。如果真係好緊張，用另一個方法去解決呢件事。」