5個月大腸癌化療療程完結 蘇施黃笑對抗癌路

前電台主持蘇施黃（阿蘇）日前在自家YouTube頻道中，上載一條名為「最後一次化療，前後五個月，速戰速決」的片段，分享最後一次入院接受化療，歷時5個月，終於完成所有療程。
阿蘇去年10月發現患上大腸癌第三期，要接受4次化療，每次入院打針後，之後14日就食口服化療藥。片中，阿蘇透露接受最後一次化療，並分享經歷，「第一次OK冇乜嘢，但第二次就最慘，入醫院住咗7日，屙嘔咗11日，入院前134磅，出院124磅，金小姐（金燕玲）都驚。」幸好出院後體重回升，現有132磅。阿蘇更透露接受第三次療程，出現其他副作用，「做完第3次化療皮膚好乾，腳摸落去好鞋烚烚，好似打十字格，好核突。我有朋友有八次癌病，佢離開咗我哋，我成日話喺佢身上學到好多嘢，所以唔好問點解你會病，或者點解發生喺你身上。」阿蘇指這位朋友每次接受化療都很辛苦，但從沒聽對方抱怨半句，令她在對方身上學懂如何面對癌魔，「冇聽佢嚡過半句，面上亦唔見佢忟憎，笑口噬噬，好返啲會煮吓嘢，叫我哋上去食，呢啲態度要學，我成日話，你覺得自己病就係病，你覺得自己冇嘢就係冇嘢，呢樣要記住。」阿蘇指拍該片目的是跟大家分享化療的歷程，可能會出現的副作用，「當你有心理準備，原來有呢啲事會發生，冇咁驚，會睇開啲。喺我病當中，最好朋友係上帝，成件事可以好輕鬆度過，希望分享畀大家，生活輕鬆啲，人開心啲，聖經有講，箴言17:22『喜樂的心乃是良藥，憂傷的靈使骨枯乾。』」