毋須逃避

52歲男士，來覆診高血壓。他服藥準時，飲食小心，惟最近血壓控制不佳，上壓常處150mmHg以上（家中量度血壓，如無其他心血管風險，上壓低於135mmHg為佳）。我：「咩時候血壓特別高？」男士：「喺驚恐發作嗰時。」
男士有驚恐症病史，常有焦慮和不時的驚恐發作。驚恐發作時會心口不適、出汗、呼吸困難、暈眩同時出現，甚至有窒息和瀕臨死亡的感覺，歷時約十多分鐘至半小時，常誤以為心臟問題，其實是情緒病。另一誤解是以為只於緊張時發作，其實在最不經意時病徵才出現。
原來男士二十多歲已經開始有驚恐發作。這痛苦，一般人難以理解。
我：「發作時你會點做？」男士：「搵個地方匿埋，食藥，立即休息，如果唔係會好辛苦。」我：「最近有無咩壓力？」男士：「媽媽幾個月前過身，腸癌。」然後低着頭。
我：「我感受到你嘅難過。而家有無諗起媽媽？」男士：「發夢成日夢到佢。」我：「夢到佢點樣？有咩同你講？」男士：「只係有個形象。」我：「你有咩想同媽媽講？」男士：「唔知……」
然後，眼淚落下來。
我遞上了紙巾，說：「下次你有驚恐發作，試吓咁樣做。病徵出現，先安頓一下，然後同自己講，呢啲感覺我試過好多次，唔須要抗拒佢，只要迎接同感受佢，直頭可以擁抱佢，因為佢提醒我要改變自己。一方面調節呼吸，感受啲唔舒服慢慢過去。如果日後習慣咗，試吓發作時唔好食藥。然後你會發覺，呢啲驚恐發作唔再影響你，就算有啲唔舒服，你都可以同佢共存。當你做到呢樣嘢嘅時候，可以心裏面同媽媽講，痛苦唔再影響我，我重新成長啦，你唔使擔心。」
男士很用心聽，眼神有點詫異。我加了對焦慮病人特別有效的血壓藥，再鼓勵他向前看。他含着淚站起來，向我道謝了五六次，才走出診症室。
作者為家庭醫學專科醫生

[信健康] 面對血壓高須知，醫生資訊要留意！【更多健康資訊：health.hkej.com】