痛苦才賭

41歲女士，來覆診甲減（甲狀腺偏低），丈夫陪伴進來。她眉頭緊鎖，整個人很繃緊，丈夫坐在她後面，面帶無奈，但表示支持。抽血顯示甲狀腺素正常，和她交代過後，她首先提出：「最近甩好多頭髮。」檢查頭髮有點稀疏，不嚴重，髮根未見異常，不像嚴重免疫系統疾病引起。情緒因素便是關鍵。我：「最近有咩壓力？」女士：「要幫爸爸還債。」女士最近情緒焦慮和低落，因常與父親吵架。父親好賭，欠下不少債項，她亦盡力幫他還債。兄長在外地，只有她守着父親。她現在沒工作。
我：「母親呢？」女士：「父母喺我好細個已經離婚。阿媽以前成日打我，拳打腳踢都有。我成日諗起以前細個唔開心嘅嘢，諗到停唔到，又經常瞓唔到。」腦海不斷重複過去的負面畫面，是抑鬱病徵之一。
我：「你一直受嘅苦唔少。成日要肩負屋企，無咗自己，一定好辛苦。相信你爸爸內心嘅痛苦亦唔會少。人點解會沉迷賭博？點解會成日心存僥幸？可以因為覺得有好多不幸，要博番好多嘢返嚟畀人睇。如果基本嘅負面情緒唔處理，再加埋環境因素，就有機會變成病態賭博。而你一直幫佢還賭債，某程度亦鼓勵佢繼續呢個行為。人嘅際遇冇得揀，但衍生嘅情緒就可以處理。處理好情緒，相應嘅行為先至會改變。只係勸佢戒賭，唔會有效果。」
女士的眼淚出來了，我遞上紙巾並解釋，其實先處理好自己情緒，讓身體平靜修復，脫髮才會停止；內心清晰，才能幫助爸爸處理情緒，幫他面對自己，離開賭博。女士同意服用血清素。我提出若果她父親願意的話，也帶他一同覆診。很多情緒問題，如果有家人一起會診，效果會更顯著。先處理好心情，才能處理好事情。
作者為家庭醫學專科醫生

[信健康] 不安心情影響健康，醫生資訊要留意！【更多健康資訊：health.hkej.com】