經期啟示

33歲女士，一直健康良好，最近月經姍姍來遲，延遲了一個多月仍未到。已排除了懷孕可能，也沒腦下垂體相關病徵。近年身體檢查，不見多囊卵巢綜合症跡象。她敍述自己病情時，狀甚焦慮。

我：「最近瞓覺點樣？」女士：「瞓得好差，所以不斷咁做運動，希望自己攰啲瞓得好啲。」其實這樣只會使經期更加混亂。女士：「同埋朋友話要補下鐵，所以食緊啲鐵質補充產品。」鐵質不能讓經期重來。這個都市，要數月經紊亂最常見原因，恐怕是情緒問題。

我：「呢排有咩壓力？」女士：「壓力好大呀。因為媽媽有乳癌，好擔心佢。」

女士是獨女，父母一早離異，她和母親相依為命。母親60多歲，罹患乳癌，經歷手術和化療，𠄘受不少痛苦。

女士：「以前媽媽成日報喜不報憂，呢次學識咗咩都同我講。」我：「咁呢個病令媽媽改變好大喎！」女士：「唉，有好有唔好啦！」我：「媽媽就改變咗喇，咁你又幾時有轉變呢？」

女士雙眼通紅，含淚不語。我：「父母離婚，讓你同媽媽關係好密切，大家都擔心對方。但關係太親密，張力就變得愈大。媽媽見到你個人咁緊張，佢梗係唔敢講心裏面嘅嘢畀你聽啦。你都唔敢表達自己，怕佢擔心。不過你以為唔講，媽媽就唔知你難受？先處理好自己情緒，學習放鬆，例如做多啲腹式呼吸、靜觀練習去鬆一鬆身體。你之前不斷操練只會令月經更加唔嚟。身體系統復元，月經自然會正常番。自身唔焦慮，先幫到身邊嘅人。」

壓力、焦慮，往往使我們身軀和人生走錯方向。上天藉身體和身邊人的訊息，提醒大家要先處理心情，再處理事情。

作者為家庭醫學專科醫生

[信健康] 壓力會影響婦女經期，醫生資訊要留意！【更多健康資訊：health.hkej.com】