紋身背後

40多歲女士，焦慮、失眠，同事轉介過來跟進。

我：「壓力來自邊度？」女士：「個女升小一，已知結果，又擔心佢之後跟唔上，我成日提佢要爭取好成績，搞到經常同佢鬧交。佢有聽障，又有過度活躍，兒童心理輔導跟進緊。」我：「先生呢？佢點睇？」女士：「佢喺大陸做嘢，好少返嚟。都係得我困獸鬥。」我：「你咁大壓力，點樣放鬆自己？」女士：「畫下嘢，face-painting，我女好鍾意㗎。呢個今日畫嘅。」她指着左前臂一個水性紋身，是一隻小馬寶莉，色彩繽紛，十分美麗。

我：「好靚，好有神采！」女士：「以前細個都鍾意紋身。」我：「係？我想知點解喎！」女士：「要型，要突出！」我：「要突出畀邊個睇？」女士：「我好勝嘛！以前乜都要爭……」

女士10歲隨父母來港，有四兄弟姊妹，感覺要跟同學爭，要同兄弟姊妹爭，才能得到父母多點注視，多點欣賞。

我：「個女得到你注視，佢仲要爭畀邊個睇？」

女士不語。

我：「反為佢注視你時，會感到不安。佢有冇暗示你唔好成日咁激動？」

女士強忍的淚水終於瀉下，猛然點頭：「其實佢成日提我叫我唔好唔開心㗎……」

我遞上了紙巾。

我：「小朋友天生就會擔憂父母，一邊要做學生角色，一邊又要承擔你哋嘅情緒，好難唔癲。佢哋唔識得表達，專注唔到，就促成咗而家愈嚟愈普遍嘅過度活躍症或小兒多動症。雖然呢個唔係唯一病因，但喺香港係好常見嘅原因。想小朋友好，就要先處理好自己。」

女士主動要求情緒藥物，我亦同意。

給過藥單，我對她說：「希望你以手上嘅小馬為榜樣，有真正嘅開心同活力，小朋友感受到嘅話，自然會做番自己，之後整個家庭都會進步。」

作者為家庭醫學專科醫生

[信健康] 分享醫患點滴，醫生資訊要留意！【更多健康資訊：health.hkej.com】